سوال متكرر عندي ..وياتري ايه الحل ؟
تمام يالا بينا نعرف أسبابه
لو مركزه مع ابنك اوي في كل تفاصيله الصغيره قبل الكبيره ووقفاله ع الواحده فإنني محسساه أنه محاصر سعادتك
وغالبا هيحس أنه مراقب وهيعند اكتر لانه عاوز شويه حريه
الحل
اهدي عليه ولو تعرفي تتغاضي اتغاضي عشان متستفزيش العند
لو انتي كثيره الأوامر والأوامر ورا بعضهاااا وخصوصا بقي لو ابنك عنده تشتت انتباه كدا وتركيزه قليل ودا كتير في ولادنا بسبب الشاشات
فانتي هتتحسسيه أنه متوتر فهيعند لأن الأوامر كتيره عليه وهيبدأ يرفض وصوته يعلي ويعند اكتر
الحل
انك تدي الأوامر واحده واحده ولما ينفذ الأمر قوليله أنا مبسوطه انك عملت كذا امدحي الفعل مش الشخص ولما يخلص اول امر قولي الأمر اللي بعده وهكذا
انك طول الوقت معندكيش مبدأ ثابت ولا بينكوا اتفاقات
يوم عاوزاه يروح التمرين ويوم مكسله ومش قادره تتحركي فتلغيه وهنا العيال بتلاقيها سبوبه أنهم يلاعبوكي زي مابتلاعبيهم ولما تطلبي يقوم ينزل التمرين هيقولك لاء الغيه زي المره اللي فاتت
الحل
اعرفي قدراتك وعلي أساسها اثبتي علي مبدأك بقي عشان العيال تحترم القرارات وتحترم أولياء الأمور ..التربيه مش بالمووود ولا علي حسب مزاجك النهارده معلش
انك تكوني ام اصلا عصبيه وبتتكلمي بشكل صعب جدااا طول الوقت وبتحسسيه أنه متوتر وخايف دا بيخليه لا ارادي يعند عشان يحمي نفسه من العصبيه بأنه يعلي عليكي عشان واحد فيكوا يكسب ..شفتي العيال كبرت وبقوا فاهمين ازاي؟
الحل
التزمي اعلي درجات ضبط النفس لأن اي انفعال مش في صالحك خالص
ها قولولي عاوزين تعرفوا اجابات اي اسئله في التربيه الفتره الجايه ؟
